Tuloy ang dominasyon ng UST Tiger Spikers sa V-League Collegiate Challenge matapos pataobin ang Emilio Aguinaldo College Generals, 25-18, 25-19, 25-19, nitong Miyerkules, Agosto 30, sa Paco Arena.

Nagtala si UAAP Season 85 MVP Josh Ybanez ng 19 puntos, sa pamamagitan ng 13 attacks, apat na blocks, at dalawang aces para pangunahan ang UST.

Dahil sa panalong ito, nakuha ng Tiger Spikers (3-1) ang solo second seed sa V-League standings, sa likod lamang ng Ateneo Blue Eagles na may 3-0 kartada.

Dinomina ng Tiger Spikers ang net defense sa pamamayagpag ni middle blocker Popoy Colinares na may apat na kill blocks, kasabay ng limang attacks para sa kabuuang siyam na puntos.

Dikit pa ang laban sa kalagitnaan ng ikalawang set ngunit nagpakawala ng 7-1 run para makuha ang 2-0 set lead at tuluyang tanggalin ang momentum sa panig ng EAC.

"We're still working on the mastery nung new system na being implemented. Marami pang kulang, tapos nag-slide back sila. We have to work harder," ani ni UST head coach Odjie Mamon pagkatapos ng laban.

Susunod na makakalaban ng UST ang FEU sa Linggo, Setyembre 3, ng tanghali sa parehong venue.