Kabilang ang isang Tomasino sa talaan ng mga nanguna sa katatapos lamang na Food Technologists licensure exam (FTLE) ayon sa resultang inilabas ng Professional Regulation Commission (PRC) noong Miyerkules, Agosto 16.

Nasungkit ng Tomasinong si Natalie Mae Caumban ang ika-sampung pwesto sa kauna-unahang Food Technologists licensure exam (FTLE) matapos nitong makakuha ng iskor na 84.50 porsyento.

Mula sa 40 na mga estudyanteng nanguna sa FTLE 2023, tanging sina Caumban at isang alumna mula sa Xavier University ang pasok sa listahan na hindi nagmula sa Unibersidad ng Pilipinas.

Nakakuha ng 49.30 porsyentong passing rate ang UST matapos makapasa ang 70 sa 142 na Tomasinong kumuha ng nasabing pagsusulit.

Samantala, itinanghal ang Unibersidad ng Pilipinas na top-performing school matapos nitong makakuha ng 100 porsyentong iskor. Sa nasabing Unibersidad din nanggaling ang nanguna sa pagsusulit.

Ayon sa PRC, 453 mula sa 1,133 na sumailalim sa FTLE ang kinilala bilang mga bagong licensed food technologist.

Ginanap ang pagsusulit sa mga syudad ng sa Metro Manila, Baguio, Cebu, Davao, Koronadal, Legazpi, Lucena, Rosales, and Zamboanga noong Agosto 10 -11, 2023.